ఒక్కొక్కరికి రూ.25 కోట్ల ఇవ్వడానికి సిద్ధమైందంటూ రాజస్థాన్ ముఖ్యమంత్రి ఆరోపించారు.

రాజస్థాన్‌లో రాాజకీయ సంక్షోభం

రాజస్థాన్‌లో రాాజకీయ సంక్షోభంమధ్యప్రదేశ్‌లో మాదిరిగానే తమ ప్రభుత్వాన్నికూడా కూల్చేందుకు బీజేపీ ప్ర‌య‌త్నిస్తోందంటూ రాజస్థాన్ ముఖ్య‌మంత్రి అశోక్ గెహ్లాట్ శనివారం ఆరోపించిన విష‌యం తెలిసిందే.

తాజాగా, ఈ వ్యవహారం ఢిల్లీకి చేరడంతో ఒక్కసారిగా రాజకీయాలు వేడెక్కాయి.

డిప్యూటీ సీఎం స‌చిన్ పైల‌ట్ తన వర్గానికి చెందిన 25 మంది ఎమ్మెల్యేలతో కలిసి ఢిల్లీకి చేరుకున్నారు.

తనను ప‌క్క‌కు త‌ప్పించే ప్ర‌య‌త్నం చేస్తున్నారంటూ అధిష్ఠానానికి గెహ్లాట్‌పై సచిన్ పైలట్ ఇప్పటికే ఫిర్యాదు చేశారు. తాజాగా, అధినేత్రి సోనియా గాంధీతోపాటు రాహుల్‌ను కలిసి ప్రస్తుతం నెలకున్న పరిస్థితిని వివ‌రించ‌నున్నట్లు తెలుస్తోంది.

గెహ్లాట్ మ‌ద్ద‌తుదారులు మాత్రం బీజేపీతో స‌చిన్ పైల‌ట్ స‌న్నిహితంగా మెలుగుతున్న‌ట్లు ఆరోపిస్తున్నారు.

మ‌ధ్య‌ప్ర‌దేశ్‌ మాదిరిగానే రాజ‌స్థాన్‌లోనూ బీజేపీ పావులు క‌దుపుతున్న‌ట్లు మండిపడుతున్నారు.

రాజ‌స్థాన్‌లో ఏర్ప‌డ్డ రాజ‌కీయ సంక్షోభానికి కాంగ్రెస్ అంత‌ర్గ‌త క‌ల‌హాలే కార‌ణ‌మ‌ని బీజేపీ మ‌రోసారి స్ప‌ష్టం చేసింది.

వాళ్ల ఇంటిని వాళ్లే చ‌క్క‌దిద్దుకోవాలంటూ కౌంటర్ ఇచ్చింది.

ఎన్నికల తర్వాత కాంగ్రెస్ ప్ర‌భుత్వం ఏర్ప‌డే స‌మ‌యానికే రాష్ట్రంలో సంక్షోభం ఏర్ప‌డింద‌ని బీజేపీ ఎంపీ ఓమ్ మాథూర్ అభిప్రాయ‌ప‌డ్డారు.

సీఎం‌, డిప్యూటీ సీఎం‌ల మ‌ధ్య ఆధిపత్య పోరే రాష్ట్రంలో రాజ‌కీయ సంక్షోభానికి కార‌ణ‌మని వ్యాఖ్యానించారు.

ఎమ్మెల్యేలను కొనుగోలు చేయడానికి బీజేపీ ప్రయత్నిస్తోందని పేర్కొంటూ గతవారం ప్రభుత్వ చీఫ్ విప్ మహేశ్ జోషి చేసిన ఫిర్యాదుతో పోలీసులు రంగంలోకి దిగారు.

ప్ర‌భుత్వాన్ని కూల్చివేయడానికి ప్ర‌లోభాల‌కు దిగారంటూ ఇద్ద‌రు వ్య‌క్తుల‌పై పోలీస్ శాఖ‌లోని ప్ర‌త్యేక ఆప‌రేష‌న్ల బృందం(ఎస్‌వోజీ) రెండురోజుల క్రితం కేసు న‌మోదుచేసింది.

వీరిద్దరి‌నీ విచారించిన అనంత‌రం ముఖ్య‌మంత్రితో పాటు మ‌రో ముగ్గురికి నోటీసులు జారీచేసింది.

ఈ కుట్రకు సంబంధించి ఆధారాలు లభ్యం కావ‌డంతో ముఖ్య‌మంత్రి స‌హా మ‌రింత‌మంది వాంగ్మూలాల‌ను న‌మోదుచేస్తామ‌ని పోలీసులు వివ‌రించారు.

ఇందులో భాగంగా ముఖ్య‌మంత్రి గెహ్లాట్, డిప్యూటీ సీఎం స‌చిన్ పైల‌ట్‌ల‌కు పోలీసులు నోటీసులు జారీచేశారు. అయితే, ఎస్‌వోజీ పోలీసుల తనకు నోటీసుల జారీచేయడంపై స‌చిన్ పైల‌ట్ ఆగ్ర‌హానికి గుర‌య్యార‌ని స‌మాచారం.

ఢిల్లీకి వెళ్లిన సచిన్ పైలట్ వర్గం ఎమ్మెల్యేలు వేర్వేరు చోట్ల బసచేశారు. గురుగ్రామ్‌‌లోని ఐటీసీ గ్రాండ్‌లో 12 మంది, ఐటీసీ మౌర్యలో మిగతావారిని ఉంచారు.

ఇదిలా ఉండగా.. సచిన్ పైలట్ అజ్ఞాతంలోకి వెళ్లినట్టు తెలుస్తోంది. తన అనుయాయులు సహా కాంగ్రెస్ నేతల ఫోన్లకు ఆయన స్పందించడం లేదు.

శనివారం రాత్రి కాంగ్రెస్ సీనియర్ నేత అహ్మద్ పటేల్‌తో పైలట్‌తో మాట్లాడినట్టు పార్టీ వర్గాలు తెలిపాయి.

ఇరు వర్గాలను సముదాయించి, ప్రభుత్వంలో అస్మమతిని చల్లార్చే ప్రయత్నం అధిష్ఠానం చేస్తున్నట్టు పేర్కొన్నాయి.

మరోవైపు, గెహ్లాట్ వర్గం ఎమ్మెల్యేలు మాత్రం ప్రభుత్వానికి సరిపడా సంఖ్య బలం ఉందని, 103 మంది ఎమ్మెల్యేలు మద్దతు తమకుందుని అంటున్నాయి.

ఇక, శనివారం రాత్రి ముఖ్యమంత్రి అశోక్ గెహ్లాట్ మంత్రులతో ఏర్పాటుచేసిన అత్యవసర సమావేశానికి పైలట్ వర్గం హాజరుకాలేదు.

ఈ సమావేశంలోనే ప్రభుత్వానికి మద్దతు ఇచ్చే ఎమ్మెల్యేలు సంతకాలతో కూడిన లేఖలను ఇవ్వాలని ఆయన కోరినట్టు తెలుస్తోంది.

అధినేత్రి సోనియా గాంధీ, రాజస్థాన్ వ్యవహారాల ఇంఛార్జ్ అవినాష్ పాండే, జనరల్ సెక్రెటరీ (ఆర్గనైజేషన్) కేసీ వేణుగోపాల్‌తో గెహ్లాట్ మాట్లాడినట్టు విశ్వసనీయ వర్గాలు తెలిపాయి.

Leave a Reply

Your email address will not be published. Required fields are marked *

You may have missed