అనాదిగా వస్తున్న ఆచారం.. మనం నేర్చుకోవాల్సిన పాఠం…సుధామూర్తి

పెళ్లి రోజు అమర జవాన్లకు నివాళి..

రష్యా కొత్త జంటను చూసి నా కళ్లు చెమర్చాయి: సుధామూర్తి
రష్యాలో ప్రతి జంట పెళ్లి చేసుకున్న మరుక్షణమే వార్ మెమోరియల్‌కు వెళ్తుంది.

అక్కడ అమర జవాన్లను స్మరించుకొని, వారి ఆశీస్సులు తీసుకుంటారు.

ఆ ప్రత్యేక సంప్రదాయం గురించి అద్భుతంగా వివరించిన సుధా మూర్తి..

1.వార్ మెమోరియల్ వద్ద అమర జవాన్లకు ఘన నివాళి.

2.పెళ్లి చేసుకున్న మరుక్షణమే రష్యా జంటలు చేసే మొదటి పని.

3.అనాదిగా వస్తున్న ఆచారం.. మనం నేర్చుకోవాల్సిన పాఠం.

4.అద్భుత అనుభవాన్ని వివరించిన సుధామూర్తి..

పుల్వామా ఉగ్రదాడిలో సీఆర్‌పీఎఫ్‌కు చెందిన 40 మంది జవాన్లు అమరులవడం యావత్ దేశాన్ని కంటతడి పెట్టించింది.

అమర జవాన్లకు భారతీయులు ఘనంగా నివాళి అర్పిస్తున్నారు.

పాక్ ప్రేరేపిత ఉగ్రవాదంపై ఆగ్రహం వెళ్లగక్కుతూ ప్రతీకారం కోసం ఎదురు చూస్తున్నారు. కులం, మతం, పెద్దా, చిన్నా అనే తేడా లేకుండా..

యావత్ దేశం సైనికుల కోసం నినదిస్తోంది. మన సైనికుల సేవలను గుర్తు చేసుకొని, అమర జవాన్ల కుటుంబాలకు సంబంధించిన వార్తలు చదివి భారతీయులు గుండెలు బరువెక్కాయి.

మనల్ని కంటికి రెప్పలా కాపాడుతున్న సైనికులకు మనం ఎప్పుడూ ఇదే స్థాయిలో గౌరవం ఇస్తున్నామా?

అమర జవాన్లు వారి సేవలకు తగిన గౌరవం పొందుతున్నారా? ఇతర దేశాల్లో సైన్యంలో పనిచేసిన వారికి ఎలాంటి గౌరవ మర్యాదలు దక్కుతున్నాయి?

ఈ ప్రశ్నలకు సమాధానం తెలియాలంటే ఇన్ఫోసిస్ ఫౌండేషన్ ఛైర్‌పర్సన్ సుధామూర్తి (నారాయణమూర్తి సతీమణి) గతంలో తన రష్యా పర్యటనకు సంబంధించి వెల్లడించిన అనుభవాల గురించి తెలుసుకోవాలి..

సరిగ్గా నాలుగేళ్ల కిందట సుధామూర్తి రష్యా పర్యటనకు వెళ్లారు. మాస్కోలో వివిధ పర్యాటక ప్రాంతాల సందర్శించిన సుధామూర్తి ఓ ఆదివారం పూట సరదాగా నగరంలోని.

శాంతి వనం’. పేరుకు తగ్గట్టే విశాలమైన ఆ పార్కులో కావాల్సినంత మనశ్శాంతి దొరుకుతుంది.

పార్కులో అందమైన ఫౌంటేన్లు ఎన్నో ఉన్నాయి. పచ్చదనం పరచుకున్న పార్కులో విరబూసిన పూల అందాలు మనసు దోచేస్తున్నాయి.

పార్కు మధ్య భాగంలో ఓ పెద్ద గద్దె ఉంది. దానిపై రష్యా విజయం సాధించిన మూడు యుద్ధాల గురించి వివరాలు చెక్కించి ఉన్నాయి.

దాని మధ్య భాగంలో అమర జవాన్ల స్మృతి స్తూపం ఉంది. రాత్రి వేళల్లో విద్యుత్ కాంతుల్లో ఆ ప్రాంతం మరింత వెలుగులు విరజిమ్ముతుందని చూస్తేనే అర్థమవుతోంది.

చల్లని సాయంత్రం వేళ నెమ్మదిగా వర్షం మొదలైంది. ఆ సమయంలో సుధామూర్తి దృష్టి ఓ యువ జంటపై పడింది.

ఆ వర్షంలో తెల్లటి గౌను ధరించి చూపు తిప్పుకోనివ్వని అందమైన ఓ అమ్మాయి.. ఇంచుమించు అదే వయసు, అంతే అందంగా ఉన్న ఓ యువకుడు పార్కులోకి వచ్చారు.

వారిని చూస్తుంటే అప్పుడే పెళ్లి చేసుకున్నట్లు తెలుస్తోంది. వర్షంలో తడవకుండా వారి సహాయకులు పెద్ద గొడుగు పట్టుకొని నిల్చోగా..

కాస్త దూరంగా ఓ ఇద్దరు యువతులు ఆ అమ్మాయి గౌను నేలపై ఆనకుండా పట్టుకొని ఉన్నారు.

అందరి దృష్టిని ఆకర్షిస్తున్న ఆ యువ జంట నేరుగా పార్కు మధ్యలో ఉన్న గద్దె వద్దకు చేరుకుంది.

ఇద్దరు కలిసి తమ చేతుల్లో ఉన్న పుష్పగుఛ్చాన్ని అక్కడ ఉంచి, మోకాళ్లపై కూర్చున్నారు. తలనుద్దెకు ఆన్చి కాసేపు మౌనంగా ప్రార్థన చేశారు.

వారి బంధువులు కొంత మంది దూరంగా ఉండి ఆ తంతును గమనిస్తున్నారు. ఇదంతా ఆశ్చర్యంగా గమనిస్తున్న సుధామూర్తిని బంధువుల్లో ఒకరు చూశారు.

కొత్తగా పెళ్లి చేసుకున్న ఓ జంట ఆ స్మృతివనం వద్ద ఏం చేస్తున్నారో తెలుసుకోవాలనే ఆత్రుత సుధామూర్తిలో అంతకంతకూ పెరుగుతున్న వేళ..

ఆ రష్యన్ వ్యక్తి ఆమెకు కాస్త సమీపంగా వచ్చి ‘మీరు భారతీయులా?’ అని ప్రశ్నించాడు.

సంప్రదాయ చీరకట్టులో ఉన్న సుధామూర్తిని భారతీయురాలని అతడు గుర్తించడం పెద్ద ఆశ్చర్యమైన విషయమేమీ కాదు.

అతడి ప్రశ్నకు అవునని బదులిచ్చిన సుధామూర్తి.. ‘మీకు ఇంగ్లిష్ వచ్చా’ అని అడిగారు. దానికి ఆయన నవ్వుతూ.. ‘ఓహ్.. నేను విదేశాల్లో పనిచేశా’ అని బదులిచ్చారు.

ఇక సుధామూర్తి ఏమాత్రం ఆలస్యం చేయకుండా ‘కొత్తగా పెళ్లి చేసుకున్న ఆ జంట వార్ మెమోరియల్ సందర్శనకు ఎందుకు వచ్చిందో కాస్త చెబుతారా’ అని ఆ రష్యన్‌ను ఆసక్తిగా అడిగారు.

దానికి ఆయన ‘ఇది ఇక్కడ సర్వసాధారణం..’ అని బదులిచ్చారు. సుధామూర్తిలో ఆత్రుత మరింత పెరుగుతున్న వేళ.. ఆయన వివరణ ఇచ్చారు.

‘మా దేశంలో ప్రతి జంట.. వివాహమైనట్లు రిజిస్టర్ చేసుకున్న మరుక్షణమే దగ్గరలోని జాతీయ స్మృతివనం వద్దకు చేరుకుంటుంది.

అక్కడ అమర జవాన్ల ఆశీస్సులు తీసుకుంటారు. ఇది ఇక్కడ అనాదిగా వస్తున్న ఆచారం.

ఎంతో మంది వీరుల ప్రాణ త్యాగం ఫలితమే నేడు మేం అనుభవిస్తున్న జీవితం. కొత్తగా పెళ్లి చేసుకున్న రోజున ప్రతి యువతీ యువకుడు ప్రస్తుతం తాము శాంతియుతంగా, స్వేచ్ఛగా జీవించడానికి కారణమైన అమరవీరులను స్మరించుకుంటారు.

పెళ్లి వేడుకలు చేసుకోవడం కంటే దేశానికే ప్రథమ ప్రాధాన్యం ఇస్తారు’ అని రష్యన్ వ్యక్తి చెప్పుకొచ్చాడు.

పెళ్లి రోజున మిలిటరీ యూనిఫాం ధరించి..
రష్యాలో ప్రతి పౌరుడు తన జీవితంలో కనీసం రెండేళ్లు సైన్యంలో తప్పనిసరిగా పని చేయాలి. అక్కడి యువత ఈ కర్తవ్యాన్ని తూ.చ.

తప్పకుండా నిర్వహిస్తారు. చాలా మంది యువకులు వివాహం చేసుకోవడానికి ముందే సైన్యంలో పనిచేస్తారు.

పెళ్లి రోజున తమ మిలిటరీ యూనిఫాం ధరించి అమర వీరుల స్మృతివనానికి రావడానికి ఇష్టపడతారు.

రష్యాలో ఇది తరతరాలుగా పాటిస్తున్న ఆచారం. మాస్కో వెళ్లినా, సెయింట్ పీటర్స్‌బర్గ్ అయినా.. ఇంకెక్కడైనా ఇలాగే చేస్తారు.

పెళ్లి రోజున యువతీ యువకులు తమకు సమీపంలోని వార్ మెమోరియల్‌ను సందర్శించి అమర జవాన్ల ఆశీస్సులు తీసుకుంటారు’ అని రష్యన్ వ్యక్తి సుధామూర్తికి వివరించారు.

రష్యాలో వార్ మెమోరియల్‌లు లెక్కకు మిక్కిలి ఉన్నాయి.

రష్యా చరిత్రలో ఆ దేశం మొత్తం మూడు సార్లు యుద్ధంలో పాల్గొంది. రష్యా కింగ్ పీటర్ ది గ్రేట్.. స్వీడన్‌తో మొట్టమొదటిసారిగా యుద్ధం చేశారు.

ఆ తర్వాత అలెగ్జాండర్.. ఫ్రాన్స్‌కు చెందిన నెపోలియన్‌తో రెండోసారి యుద్ధం చేశారు. 1945లో రెండో ప్రపంచ యుద్ధంలో హిట్లర్ సేనతో రష్యా మూడోసారి యుద్ధంలో పాల్గొంది.

ఈ మూడు యుద్ధాల్లోనూ రష్యా విజయం సాధించింది. ఆయా యుద్ధాల్లో వేలాది మంది సైనికులను కోల్పోయింది.

ఒకరకంగా భారత్‌ను కాపాడింది రష్యానే!
రెండో ప్రపంచ యుద్ధ సమయంలో హిట్లర్ బారి నుంచి భారత్‌ను ఒకరకంగా తామే రక్షించామనేది రష్యా భావన.

తాము హిట్లర్ సేనలను ఓడించడం వల్లే వారు భారత్‌లో అడుగు పెట్టలేకపోయారని వారి వాదన.

యుద్ధాల్లో అమరులైన సైనికులకు గుర్తుగా రష్యాలో వందలాది ప్రాంతాల్లో వార్ మెమోరియళ్లు నిర్మించారు. రష్యా ప్రభుత్వం వాటిని పర్యాటక ప్రాంతాలుగా తీర్చిదిద్దింది.

రష్యా పౌరులు అలాంటి పార్కులకు వెళ్లడాన్ని గర్వకారణంగా భావిస్తారు. మాస్కోకు వెళ్లే సందర్శకులు అక్కడి వార్ మొమోరియల్‌ను తప్పనిసరిగా సందర్శిస్తారు.

ఇదంతా విన్న తర్వాత తాను మన దగ్గర జరిగే పెళ్లి వేడుకల గురించి గుర్తుచేసుకున్నట్లు సుధామూర్తి తెలిపారు.

పెళ్లి అనేది ప్రతి వ్యక్తి జీవితంలో మరచిపోలేని ఓ ప్రత్యేక అనుభవం. దాన్ని అత్యంత మధురంగా నిర్వహించుకోవాలని ప్రతి వ్యక్తీ తాపత్రయపడతాడు

నగలు, చీరల నుంచి విందు వినోదాల వరకు ఎక్కడా వెనుకాడకుండా ఖర్చు చేస్తారు.

కొంత మంది తాము జీవితాంతం కూడబెట్టిన సొమ్మును పెళ్లి వేడుకకు ఖర్చు పెడతారు.

పెళ్లి వేడుకల పేరుతో చేసే వ్యయంతో కొన్ని పేద కుటుంబాలు జీవితాంతం నిశ్చింతగా గడపవచ్చని సుధామూర్తి అభిప్రాయం.

‘ఆ రోజు రష్యన్ జంట తమ వీర జవాన్లకు ఇచ్చిన నివాళి చూసిన తర్వాత నా కళ్లు చెమర్చాయి.

రష్యా నుంచి మనం ఈ విషయంలో పాఠం నేర్చుకోవాల్సి ఉంది’ అని సుధామూర్తి అన్నారు. రష్యన్లను చూసిన తర్వాతైనా మన తీరు మార్చుకోవాలేమో.. అంటూ ఆమె ముగించారు.

Leave a Reply

Your email address will not be published. Required fields are marked *

You may have missed