విజయవాడ బరిలో కోటీశ్వరులు.. కేశినాని నాని, పీవీపీ ఆస్తులెంతంటే?
విజయవాడ బరిలో కోటీశ్వరులు.. కేశినాని నాని, పీవీపీ ఆస్తులెంతంటే?
శుక్రవారం మంచి ముహూర్తం కావడంతో ఆంధ్రప్రదేశ్‌లో శాసనసభతోపాటు పార్లమెంటు స్థానాలకూ అన్ని పార్టీల అభ్యర్థులూ తమ మద్దతుదారులతో తరలివచ్చి అట్టహాసంగా నామినేషన్లు వేశారు.
1.బెజవాడ బరిలో టీడీపీ, వైసీపీల నుంచి బరిలోకి దిగిన కోటీశ్వరులు.
2.పారిశ్రామికవేత్త పొట్లూరి వరప్రసాద్ ఆస్తులు రూ.348 కోట్లు.
3.టీడీపీ అభ్యర్థి కేశినాని నాని ఆస్తులు కూడా కోట్లలోనే.
శుక్రవారం మంచి ముహూర్తం కావడంతో ఏపీలో పెద్ద ఎత్తున నామినేషన్లు దాఖలు చేశారు. శాసనసభతోపాటు పార్లమెంటు స్థానాలకూ అన్ని పార్టీల అభ్యర్థులూ తమ మద్దతుదారులతో తరలివచ్చి అట్టహాసంగా నామినేషన్లు వేశారు. ఇక, విజయవాడ పార్లమెంటు స్థానం నుంచి అధికార టీడీపీ నుంచి సిట్టింగ్ ఎంపీ కేశినేని నాని, వైసీపీ తరఫున వ్యాపారవేత్త పొట్లూరు వీర ప్రసాద్‌లు పోటీచేస్తోన్న విషయం తెలిసిందే. ఈ ఇద్దరూ శుక్రవారం నామినేషన్లు దాఖలు చేశారు. విజయవాడ వైసీపీ ఎంపీ అభ్యర్థిగా బరిలోకి దిగిన పీవీపీ తన కుటుంబ ఆస్తుల మొత్తం విలువ రూ.347.75కోట్లుగా ప్రకటించారు. ఈ మేరకు ఎన్నికల రిటర్నింగ్‌ అధికారికి సమర్పించిన అఫిడవిట్‌లో తన ఆస్తుల వివరాలను ఆయన వెల్లడించారు. కుటుంబానికి ఉన్న అప్పులు రూ.20.95 కోట్లుగా చూపించారు.
పీవీపీ పేరుతో రూ.39.36 కోట్లు, భార్య ఝాన్సీ పేరిటి రూ.196.60కోట్లు, ఇద్దరు పిల్లల పేరిట రూ.32.95లక్షల విలువైన చరాస్తులు ఉన్నట్టు వెల్లడించారు. పీవీపీకి రూ.45.95 కోట్లు, భార్యకు రూ.65.51 కోట్ల విలువైన స్థిరాస్తులు ఉన్నాయి. అప్పులు సైతం పీవీపీ పేరుతో రూ.2.91 కోట్లు, భార్యకు రూ.18.03 కోట్లు ఉన్నట్టు చూపించారు. ఇక, 2013-14 ఆర్థిక సంవత్సరంలో రూ.88,02,400, 2014-15లో రూ.45,72,290, 2015-16లో రూ.23,15,850, 2016-17లో రూ.23,14,550, 2017-18లో రూ.53,41,030 ఆదాయపు పన్ను చెల్లించినట్టు వెల్లడించారు.
టీడీపీ ఎంపీ అభ్యర్థి కేశినేని శ్రీనివాస్‌(నాని) తన అఫిడవిట్‌లో కుటుంబ ఆస్తుల మొత్తం విలువ రూ.80.82 కోట్లుగా చూపించారు. ఆయన పేరుతో అప్పులు రూ.51.23 కోట్లున్నాయని,. మరో రూ.23.29 కోట్ల వివాదాస్పద బకాయిలు సైతం ఉన్నట్టు తెలిపారు. నాని పేరుతో రూ.10.62కోట్లు, భార్య పావని పేరుతో రూ.1.61కోట్లు, కుమార్తెలు శ్వేత, ప్రసూనాంబల పేరుతో రూ.1.13కోట్ల విలువైనవి చరాస్తులున్నట్టు వెల్లడించారు. అలాగే స్థిరాస్తుల విషయానికి వస్తే నాని పేరు మీద రూ.66.07కోట్లు, భార్యకు రూ.1.36కోట్ల విలువైనవి ఉన్నట్టు పొందుపరిచారు. 2017-18లో పన్ను చెల్లించిన కుటుంబ ఆదాయం రూ.26.87లక్షలుగా చూపించారు. 2013-14 ఆర్థిక సంవత్సరంలో రూ.-4,59,22,030లోటుగాగా చూపారు. 2014-15లో రూ.11,44,960, 2015-16లో రూ.6,00,000 2016-17లో రూ.4,50,00, 2017-18లో రూ.6,00,030 వ్యక్తిగత ఆదాయపు పన్ను చెల్లించినట్టు వెల్లడించారు.