జషిత్ కిడ్నాప్ వెనుక క్రికెట్ బెట్టింగ్ ముఠా హస్తం?

మండపేట బాలుడు జషిత్ కిడ్నాప్ కేసులో అనేక అనుమానాలు వెల్లువెత్తుతున్నాయి. బాలుడి కిడ్నాప్ వెనుక క్రికెట్ బెట్టింగ్ ముఠా హస్తం ఉందన్న ఆరోపణలు వెల్లువెత్తుతున్నాయి.

తూర్పుగోదావరి జిల్లా మండపేటలో నాలుగేళ్ల బాలుడు జషిత్ కిడ్నాప్వ్యవహారం సుఖాంతమైనప్పటికీ ఈ కేసులో ఎన్నో అనుమానాలు అలాగే ఉండిపోయాయి. బాలుడిని ఎత్తుకెళ్లిన కిడ్నాపర్లు మూడ్రోజుల తర్వాత క్షేమంగా వదిలివెళ్లడంతో తల్లిదండ్రులను బెదిరించేందుకు అలా చేశారా? అన్న అనుమానాలు వ్యక్తమవుతున్నాయి.

బ్యాంకు ఉద్యోగి అయిన జషిత్ తండ్రి ప్రతి ఆదివారం క్రికెట్ ఆడుతుంటాడని స్థానికులు చెబుతున్నారు. మండపేట, అనపర్తి ప్రాంతాలు క్రికెట్ బెట్టింగ్‌కు స్థావరాలుగా ఉన్నాయి. జిల్లాలోని అనేక ప్రాంతాల నుంచి చాలామంది బెట్టింగుల కోసం ఇక్కడి వస్తుంటారు. ఎవరైనా బెట్టింగ్‌ డబ్బులు ఇవ్వకపోతే ముక్కు పిండి వసూలు చేసేందుకు వారికి ప్రత్యేక బలగం ఉంటుంది. దీంతో జషిత్ తండ్రి క్రికెట్ బెట్టింగ్‌ ముఠాతో ఏమైనా లావాదేవీలు జరిపాడా? లేక స్థానికంగా ఎవరితోనైనా అతడికి గొడవలు ఉన్నాయా? అన్న ప్రశ్నలు తలెత్తుతున్నాయి. 

జషిత్‌ను కిడ్నాపర్లు వదిలివెళ్లిన కుతుకులూరు ప్రాంతం బెట్టింగులకు ప్రసిద్ధి. అక్కడ ఉండే ఇటుక బట్టీల మాటున బెట్టింగ్ యథేచ్ఛగా జరిగిపోతుంటుంది. ఎప్పుడైనా పోలీసులు వచ్చినా వీరికి ముందే సమాచారం అందేలా ఏర్పాట్లు చేసుకున్నారు. బెట్టింగ్‌లో ఎవరైనా బాకీ పడితే అవి వసూలు చేయనిదే అక్కడి నుంచి బయట పడే పరిస్థితి ఉండదు. లేకపోతే వారి కుటుంబసభ్యులను కిడ్నాప్ చేసి బెదిరించి డబ్బులు తీసుకుంటారు. జషిత్ కిడ్నాప్ కేసులోనూ అదే జరిగిందా? అన్న కోణంలో పోలీసులు దర్యాప్తు చేస్తున్నారు. ఈ కేసులో క్రికెట్ బెట్టింగ్ ముఠాల హస్తం ఉంటుందని ముందు నుంచే ఆరోపణలు వినిపిస్తున్నాయి. కానీ పోలీసులకు ఇప్పటివరకు దానికి సంబంధించి ఎలాంటి క్లూ దొరకలేదు. 

బాలుడిని అంత పకడ్బందీగా ఎత్తుకెళ్లడం, కిడ్నాపర్లలో రాజు అనే వ్యక్తి తనకు తెలుసని జషిత్ చెప్పడంతో ఎవరో పక్కా స్కెచ్‌తోనే ఈ కిడ్నాప్‌ చేసినట్లు తెలుస్తోంది. బాలుడిని మూడు రోజుల తర్వాత మండపేటకు కేవలం 15కిలోమీటర్ల దూరంలో ఉన్న కుతుకులూరులోనే వదలిపెట్టడంతో సమీపం ప్రాంతాల్లోనే అతడిని దాచి ఉంటారని నిర్ధారణకు వచ్చారు. ఏదేమైనా బాలుడు క్షేమంగా తిరిగొచ్చాడన్న సంతోషం ఓ పక్క ఉన్నా.. దీనికి కారకులైన వారు ఇంకా దొరకలేదన్న అసంతృప్తి ప్రజలతో పాటు పోలీసు వర్గాల్లోనూ ఉంది. తమ సత్తాకే సవాల్‌గా మారిన ఈ కేసును త్వరలోనే చేధించి నిందితులను చట్టం ముందు నిలబెట్టాలని తూర్పుగోదావరి జిల్లా పోలీసులు భావిస్తున్నారు. ఈ కేసుపై స్పందించిన ముఖ్యమంత్రి వైఎస్ జగన్ ఓ వైపు పోలీసులను అభినందిస్తూనే.. ఇంకా 50శాతం పని మిగిలే ఉందని హెచ్చరించడం గమనార్హం. 

Leave a Reply

Your email address will not be published. Required fields are marked *

You may have missed