భారత్, పాక్ మధ్య భారీ గోడ కట్టాలి
భారత్ పాక్ మధ్య గోడ నిర్మాణం చేపట్టాలని లుథియానా ఎంపీ, కాంగ్రెస్ నేత రవ్‌నీత్ సింగ్ బిట్టు కోరారు. పుల్వామా దాడికి ప్రతీకారం తీర్చుకున్నప్పుడే అమర జవాన్లకు ఘన నివాళి అన్నారు.
పుల్వామా ఉగ్రదాడిపై దేశవ్యాప్తంగా ఆగ్రహజ్వాలలు పెల్లుబుకుతున్నాయి. 40 మందికి పైగా సీఆర్‌పీఎఫ్ జవాన్లను కోల్పోయి దేశం కంటతడి పెడుతోంది.
సీమాంతర ఉగ్రవాదాన్ని ఎగదోస్తున్న పాకిస్థాన్‌పై యావత్ దేశం మండిపడుతోంది. దాయాది దేశాన్ని ఇక ఎంతమాత్రం ఉపేక్షించేది లేదని.. తగిన గుణపాఠం చెప్పాల్సిందేనని భారతీయులు డిమాండ్ చేస్తున్నారు.
సర్జికల్ దాడులు కాదు, ఈసారి యుద్ధమే చేయాలని కోరుతున్నారు.
పాక్‌తో సంబంధాలన్నింటినీ తెంచుకోవాలని సూచిస్తున్నారు. ఈ క్రమంలో కాంగ్రెస్‌కు చెందిన ఓ ఎంపీ మరో అడుగు ముందుకేసి పాక్ సరిహద్దు పొడవునా గోడ నిర్మాణం చేపట్టాలని డిమాండ్ చేశారు.
పాకిస్థాన్‌తో భారత్ అన్ని రకాల సంబంధాలను తెంచుకోవాల్సిన అవసరం ఉందని కాంగ్రెస్ ఎంపీ, పంజాబ్ నేత రవ్‌నీత్ సింగ్ బిట్టు కోరారు. ఇరు దేశాల మధ్య గోడ నిర్మాణం చేపట్టాలన్నారు.
మెక్సికో సరిహద్దు వెంట అమెరికా నిర్మించ తలపెట్టిన గోడ మాదిరిగానే భారత్ కూడా భారీ గోడ నిర్మాణం ప్రారంభించాలని కోరారు.
పుల్వామా ఉగ్రదాడి తనను తీవ్రంగా కలచివేసిందని, ఈ దాడికి ప్రతీకారం తీర్చుకున్నప్పుడే అమర జవాన్లకు ఘనమైన నివాళి ఇచ్చిన వారమవుతామని ఎంపీ బిట్టు వ్యాఖ్యానించారు.
పాకిస్థాన్‌తో వ్యాపార, వాణిజ్య కార్యక్రమాలన్నింటినీ నిలిపేయాలని కోరారు.
పుల్వామా తరహా ఘటనలు పున:రావృతం కాకుండా పాకిస్థాన్‌కు గట్టి గుణపాఠం చెప్పాలన్నారు.
సోమవారం లుథియానాలో ఓ పాఠశాలలో జరిగిన కార్యక్రమంలో రన్‌వీర్ సింగ్ మాట్లాడారు. పంజాబ్ మాజీ ముఖ్యమంత్రి బియంత్ సింగ్ తనయుడైన రన్‌వీర్ సింగ్..
లుథియానా నియోజకవర్గం నుంచి లోక్ సభకు ప్రాతినిధ్యం వహిస్తున్నారు. బియంత్ సింగ్‌ను ఖలిస్థాన్ తీవ్రవాదులు కాల్చి చంపారు.
మెక్సికో నుంచి అక్రమ వలసలను అడ్డుకోవడానికి అమెరికా అధ్యక్షుడు డొనాల్డ్ ట్రంప్.. సరిహద్దు వెంట భారీ గోడ నిర్మాణం తలపెట్టారు. ఈ అంశంపై ప్రపంచ దేశాలు పలు విధాలుగా స్పందించాయి.
ఇదే తరహాలో పాక్ సరిహద్దు వెంట గోడ నిర్మాణం తలపెట్టాలనే అంశానికి మద్దతు పెరుగుతోంది. ఈ తరహా డిమాండ్ రావడం ఇదే తొలిసారి కాదు.
ఎల్‌వోసీ వెంట భారీ గోడ నిర్మాణం చేపట్టాల్సిన అవసరం ఉందని హోంమంత్రి రాజ్‌నాథ్ సింగ్ గతంలోనే అభిప్రాయపడ్డారు.