లోక్‌సభ స్పీకర్‌ ఓం బిర్లాతో శుక్రవారం వైఎస్సార్ కాంగ్రెస్ పార్టీ ఎంపీల బృందం భేటీ అయింది…
YSRCP ఎంపీ రఘురామపై జగన్ వ్యూహం ఇదే.. లోక్‌సభ స్పీకర్‌తో ఎంపీల బృందం భేటీ..
వైసీపీ ఎంపీ రఘురామ కృష్ణరాజు వివాదం క్లైమాక్స్‌కు చేరుకుంది. ఆయనపై అనర్హత వేటు వేయాలంటూ వైసీపీ ఎంపీలు లోక్‌సభ స్పీకర్‌ను కోరారు.
లోక్‌సభ స్పీకర్‌ ఓం బిర్లాతో శుక్రవారం వైఎస్సార్ కాంగ్రెస్ పార్టీ ఎంపీల బృందం భేటీ అయింది.
నరసాపురం వైసీపీ ఎంపీ రఘురామ కృష్ణంరాజుపై అనర్హత వేటు వేయాలంటూ స్పీకర్‌ను వైసీపీ ఎంపీలు కోరారు.
లోక్‌సభ స్పీకర్‌ను కలిసిన వారిలో వైసీపీ రాజ్యసభ సభ్యుడు విజయసాయిరెడ్డి, లోక్‌సభ సభ్యులు పెద్దిరెడ్డి మిథున్‌రెడ్డి, లావు కృష్ణదేవరాయ, మార్గాని భరత్, నందిగం సురేష్ ఉన్నారు.
రఘురామ కృష్ణంరాజు పార్టీ వ్యతిరేక కార్యకలాపాలకు పాల్పడుతున్నారని.. ఆయనపై అనర్హత వేటు వేయాల్సిందిగా స్పీకర్‌ ఓం బిర్లాను ఆ పార్టీ నాయకత్వం కోరినట్లు సమాచారం.
శుక్రవారం ఎంపీలు, న్యాయనిపుణులతో కూడిన బృందం గన్నవరం విమానాశ్రయం నుంచి ఢిల్లీ వెళ్లారు.
రఘురామరాజు బీజేపీకి చేరువవుతున్నారని వార్తలు వస్తున్న నేపథ్యంలో ఆయన్ను పార్టీ నుంచి బహిష్కరించకుండా..
ఏకంగా లోక్‌సభ సభ్యత్వం రద్దు చేయించి.. ప్రజాప్రతినిధిగా దూరం చేయాలన్నది వైసీపీ అధినేత, సీఎం వైఎస్ జగన్మోహన్‌రెడ్డి, ఆ పార్టీ ముఖ్య నేతల వ్యూహంగా పార్టీ వర్గాలు చెబుతున్నాయి.
పార్టీకి వ్యతిరేకంగా మాట్లాడుతున్నారని రఘురామకృష్ణరాజుకు విజయసాయిరెడ్డి వైఎస్సార్ కాంగ్రెస్ పార్టీ లెటర్‌హెడ్‌పై షోకాజ్‌ నోటీసు జారీ చేసిన విషయం తెలిసిందే.
అయితే తమది యువజన శ్రామిక రైతు కాంగ్రెస్ అని, వైఎస్సార్ కాంగ్రెస్ పార్టీ అన్న మాటే వాడకూడదని ఎన్నికల కమిషన్‌ చెప్పిందని.. వేరే పార్టీ ఇచ్చిన షోకాజ్‌కు తానెలా బదులిస్తానని పేర్కొంటూ రఘురామరాజు సీఎంకు లేఖ రాసిన సంగతి తెలిసిందే.
వైసీపీ నేతలు తనను దూషించడం, దిష్టిబొమ్మలను తగులబెట్టడం వంటి ఘటనల నేపథ్యంలో వారి నుంచి తనకు ప్రాణహాని ఉందని..
కేంద్ర బలగాలతో రక్షణ కల్పించాలని ఓం బిర్లాను, కేంద్ర మంత్రులు రాజ్‌నాథ్‌సింగ్‌, కిషన్‌రెడ్డిలను కలిసి అభ్యర్థించారు.
ఈ తరుణంలో పార్టీకి తలనొప్పిగా మారిన ఎంపీ రఘురామ కృష్ణరాజును వదిలించుకోవడమే కాకుండా, పార్టీ తరఫున ఎన్నికైన ఎంపీ పదవిని సైతం దూరం చేయాలని వైసీపీ అధిష్టానం వ్యూహం పన్నినట్లు తెలుస్తోంది.